Maskarada di Omayra Leeflang a Kai

KOMUNIKADO ****
18 di yanüari 2010

Na opinion di Mayra Coffie, lider di kampaña pa Lista di Kambio:

DURANTE 15 AÑA PAR NO A HASI
NET NET NADA PA E HENDE MUHE


WILLEMSTAD – Lista di Kambio ta rechasá e insinuashonnan ku Omayra Leeflang a lansa den nos direkshon ku hende muhé no tin balor pa nos, pasombra den e promé 10 kandidatonan, 1 so ta hende muhé. Pa Lista di Kambio, formá pa Partido MAN, Niun Paso Atras i Forsa Kòrsou, e hende muhé tin tur balor.

Salí for di e Idiologia Sosial Demókrata, hende muhé i hende hòmber ta igual p’esei pa nos ta sumamente straño di por a tuma nota di un komunikado di prensa di Sra. Omayra Leeflang, kaminda e ke krea e impreshon ku e tres partidonan aki no tin balor pa hende muhé riba nos lista.

Laga nos ban hasi un análisis kiko PAR a bin ta hasi pa e hende muhé e último 15 añanan ku a pasa aki. Den un solo palabra, nos mester bisa: Nèt net nada. Den PAR e último 15 añanan, PAR no tabata tin e kurashi di bini ku un lei ku ta sali na defensa di e hende muhé.

E mes un issuenan ku ta preokupá tantu e hende hòmber, ta preokupashon tambe pa e hende muhé, esta, e oumento bárbaro di kosto di bida ku nos pais a bin ta konosé último añanan aki.

Enseñansa ku no a konosé un maneho adekuá i te ku awe no ta duna muchanan di kasnan humilde un chèns pa desaroyá nan mes maksimalmente. No mester lubidá e oumento di kriminalidat i e edat dje hóbennan ku ta kometé un krímen, ku ta bahando.

Huntu ku tur e gatenan i eskandalonan ku a bin ta rondoná PAR, espesialmente un eskandalo manera Karla Omayra, un barku ku a kumpra pa supuestamente nos muchanan, yu di mama, por a bira matros, a resultá un frakaso grandi. Ta esaki ta e doló ku e mama, e hende muhé ta sinti dia aden dia afó i ku PAR ke trata na hasi bofon di dje.

Alkontrario ta Frakshon di Partido MAN den Parlamento di Antia, nos representantenan, a pasa e lei di maternidat, kaminda e dama na estado ku ta na punto di bira mama, ta haña 2 siman èkstra riba e dianan liber ku e lo tabata tin pa lei, esta di 12 pa 14 siman. Tambe a bira lei ku na momentu ku un hende muhé ta na estado, e no por traha anochi ni por traha pará riba pianan.

Ta di e forma aki ta traha o laga, pasombra Partido MAN si a mira e importansia i nesesidat pa por a bini ku un kambio asina aki, na fabor di e hende muhé.

Pues un biaha mas, si bo hasi un análisis di kiko PAR a nifiká berdaderamente pa un hende muhé aki na Kòrsou, bo no ta mira esaki bek ningun kaminda, pasombra for di nan kurason, nan mes no tabata haña esaki importante.


Pa loke ta trata e parti ku Sra. Leeflang a referí na kasá di e tres lidernan di Lista Kambio, nos tin e siguiente mensahe.

Isbelly Cooper, pa hopi aña ta trahando komo dòkter di mucha aki na Kòrsou i ta dunando un aporte balioso i grandi na kuido di nos futuro di mayan. Sra. Cooper ta un profeshonal total den su trabou i tur hende atraves di último añanan aki a bin ta apresiá su aporte i sosten ku e ta dunando komo dòkter di mucha.

Sra. Helena Damon, ta traha komo atministrador ya pa algun aña kaba aki na Kòrsou, dunando tur su aporte na desaroyo di nos pais i no ta pòrnada e ta sinta.

Sra. Yanubi Pierre, riba un base boluntario ta yudando na un skol di mucha chikitu di e religion Adventista. E ta konsentrá mas riba e muchanan ku ta papia spañó.

Ta bon pa tur hende ta na altura ku tur tres kasanan di e tres lidernan di Lista Kambio, ta personanan ku tin nashonalidat Ulandes. Dicho sea de paso, Prins Claus d.f.m. ku tabata kasá ku su mahestat La Reina, tabata un Aleman i kasá di aktual Prínsipe heredero, Willem Alexander ta un Argentino.

Ta bon pa tur hende sa ku den e 4 añanan ku a pasa aki, Sra. Omayra Leeflang komo Minister di Enseñansa a kore ku direktor di Departamentu di Enseñansa ku tabata un hende muhé, ela kore ku direktor di ofisina di eksamen ku tabata un hende muhé, ela kore ku direktor di asuntu di hubentut ku ta hende muhé, ela kore ku su kolaboradornan ku tabata hende muhé i pa kolmo e kier a kore ku Diputado di enseñansa di Kòrsou, ku ta un hende muhé.

Awor ku nos a drenta den e siman berdadero di kambio, un i tur por mira klaramente kon desesperá e hendenan di PAR ta, pasombra un kos ku no ta issue, nan ke trata na hasi issue i konfundí e pueblo aki.

Pueblo di Kòrsou no ta kens mas. E hende muhé di Kòrsou no ta kèns mas. Despues di 15 aña PAR ta basta i e ora pa e kambio a yega! Palabra ta na pueblo, awor ku e maskarada di Sra. Omayra Leeflang a kai i ku nos a mustra e berdadero kara di su apresio pa hende muhé!!!

Atentamente

Sra. Mayra Coffie
Lider di Kampaña
Lista di Kambio